ডবকা,১০ জানুৱাৰী : বন বিভাগৰ কামত বাধা দিয়া আৰু বন বিষয়াৰ কাৰ্য্যালয়ত উপস্থিত হৈ বন কৰ্মীক দুৰ্ব্যৱহাৰ কৰাৰ অভিযোগত ডবকাত আটক এজন বিজেপিৰ নেতা I বিজেপিৰ ডবকা টাউন মণ্ডলৰ সম্পাদক তথা ডবকা থানা নাগৰিক সমিতিৰ সভাপতি সুগম চক্ৰৱৰ্তী অভিযোগ অনুসৰি আজিৰ দিনৰ ভাগত চালানবিহীনভাৱে এখন ডাম্পাৰে বনজ সম্পদ সৰবৰাহ কৰাৰ তথ্য লাভ কৰিছিল ডবকাস্থিত যমুনা উপত্যকা বনাঞ্চলিক বিষয়াৰ কাৰ্য্যালয়ে I সেইমৰ্মে দুপৰীয়া ভাগত উক্ত ডাম্পাৰ খন বনাঞ্চলিক বিষয়াৰ কাৰ্য্যালয়ৰ সন্মুখেৰে পাৰ হবলৈ ধৰোতেই তেওঁলোকে ৰখাবলৈ নিৰ্দেশ দিয়ে I ডাম্পাৰ খন নৰখাই তাৰ পৰা দ্ৰুতবেগেৰে আতৰি যায় আৰু তেনে সময়তে বনকৰ্মীৰ দলটোৱে ডাম্পাৰ খনৰ পিছে পিছে খেদি যায় I কিছুদূৰ যোৱাৰ পাছতেই বিজেপি নেতা সুহম চক্ৰৱৰ্তীয়ে নিজৰ AS02 AJ 1994 নম্বৰৰ টাটা টিয়াগ গাড়ীখনেৰে বন বিভাগৰ গাড়ী খন বাট আগুছি ধৰে I ইমানতে ক্ষান্ত নাথাকি বিজেপি নেতাজনে ডবকা স্থিত যমুনা উপত্যকা বনাঞ্চলিক বিষয়াৰ কাৰ্য্যালয়ত উপস্থিত হৈ বন কৰ্মকৰ্মী আৰু বন বিষয়াসকলকো দুৰ্ব্যৱহাৰ কৰে Iপাছত বনকৰ্মী সকলে বিজেপি নেতাজনক নিজ কাৰ্য্যালয়তে আটক কৰি ৰাখেIআনহাতে বিজেপি নেতাজনক মুকলাবলৈ দলীয় অন্যান্য বহু লোকৰ সমাগম ঘটে বন বিষয়াৰ কাৰ্য্যালয়লৈ I
কিছুদিন পূৰ্বে বিজেপি নেতা গৰাকীয়ে নীলবাগানত ৰাষ্ট্ৰীয় ঘাইপথত আৰক্ষীয়ে তালাচি চলোৱাৰ সময়ত আৰক্ষীকো দুৰ্ব্যৱহাৰ কৰাৰ অভিযোগ উত্থাপিত হৈছিল I আবেলি পৰত বিজেপি নেতাজনক বন বিভাগে কোনো এক অদৃশ্য শক্তিৰ বাবে মুকলি কৰি দিয়ে Iআনহাতে বিজেপি নেতাজন মুকলি হৈ অহাৰ পাছত সাংবাদিকৰ আগতহে লম্ফ-জম্ফ কৰাৰো অভিযোগ উত্থাপিত হৈছে I
সাংবাদিকে কি কাৰনত তেওঁক আটক কৰা হৈছে বুলি জানিব বিচৰাত তেওঁ উত্তৰ দিয়াটো দূৰৰ কথা সাংবাদিককহে সাংবাদিক যেন লগা নাই বুলি কৈ আতৰি যায় I শাসকীয় দলৰ নেতা হোৱাৰ বাবেই নেকি ? বন বিভাগৰ লোকক কৰ্তব্যত বাধা প্ৰদান কৰাৰ লগতে বনকৰ্মীক দুৰব্যৱহাৰ কৰাৰ পাছতো সাৰি যাব পাৰে তাকে লৈ সচেতন মহলৰ মাজত সৃষ্টি হৈ লাখটকীয়া প্ৰশ্নৰ I