গণ সংক্ৰমনৰ আশংকাক আওকান ৰাইজৰ, নাই সামাজিক দূৰত্ব, নাই মাস্ক
বজালীত দ্বিতীয়টো কন্টেইনমেণ্ট জ’ন। চীল হ’ল বজালী অতিৰিক্ত জিলা আৰু সত্ৰ ন্যায়াধীশৰ আদালত ।
সমগ্ৰ বজালীত এতিয়া কৰ’নাৰ আতংক । আৰক্ষী থানা, পেট্ৰল পাম্প, ধাবা, আদালত সকলোতে ওলাইছে কভিড পজিটিভ । দেওবাৰে বজালীৰ অতিৰিক্ত সত্ৰ ন্যায়াধীশ আদালতত দুজনকৈ ব্যক্তিৰ কৰ’না পজিটিভ ফলাফল অহাৰ পিছতে আজি প্ৰশাসনে গোটেই আদালত চৌহদ কন্টেইনমেণ্ট জ’ন হিচাপে ছীল কৰি দিয়ে । বজালীত এইটো দ্বিতীয় কন্টেইনমেণ্ট জ’ন, ইয়াৰ পূৰ্বে শুকিলাপাৰ গাঁৱৰ এটা অঞ্চল প্ৰশাসনে কন্টেইনমেণ্ট জ’ন কৰিছিল । উল্লেখ্য যে নিতৌ এটাৰ পিছত এটা পজিতিভ ৰিজাল্ট আহি থকাৰ পিছতো মহকুমাটোত একপ্ৰকাৰ সজাগ হোৱা নাই ৰাইজ । প্ৰশাসনৰ নীতি নিয়মক আওকান কৰি পাঠশালা নগৰত কোনো সামাজিক দূৰত্ব আৰু মুখত মাস্ক পৰিধান নকৰাকৈ যেনি-তেনি মুকলিকৈ ঘূৰি ফুৰিছে মানুহ যাৰ বাবে শীঘ্ৰেই বজালীত পুনৰ কঠোৰ লকডাউন দিবলৈ জিলা প্ৰশাসন আৰু চৰকাৰক দাবী জনাইছে বজালী জিলা অসম জাতীয়তাবাদী যুৱ ছাত্ৰ পৰিষদে ।