বৃহৎ বেংক জালিয়াতিৰ গোচৰত অভিযুক্ত হৈ বিদেশত পলাই থকা দুই প্ৰৱঞ্চক নীৰৱ মোদী আৰু মেহুল ছৌকচিৰ ক্ষেত্ৰত এক বৃহৎ সফলতা অৰ্জন কৰিছে ই ডি-এ৷ এই দুই হাইপ্ৰফাইল প্ৰৱঞ্চকৰ পৰা প্ৰায় ১.৩৫০ কোটি টকা মূল্যৰ সোণ আৰু হীৰাৰ গহণা সফলতাৰে ঘূৰাই অনা হৈছে ভাৰতলৈ৷ প্ৰৱঞ্চক দুজনে ২,৩০০ কিলোগ্ৰাম ওজনৰ এই বিশাল পৰিমাণৰ গহণাখিনি প্ৰথম অৱস্থাত লুকুৱাই থৈছিল ডুবাইত৷ কিন্তু পৰৱৰ্তী সময়ত বেংক জালিয়াতি সম্পৰ্কত তদন্ত আৰম্ভ হোৱাৰ লগে লগে এই গহণাখিনি হংকঙলৈ পঠিয়াই দিয়া হৈছিল৷ ২০১৮ চনতে সবিশেষ তথ্য লাভ কৰিছিল ই ডি-এ৷ ১০৮টা কনচাইনমেণ্টত ভাগ কৰা গহণাখিনিৰ ৩২টা নীৰৱ মোদীৰ৷ বাকী ৭৬টা কনচাইনমেণ্টেই মেহুল ছৌকচিৰ বুলি জানিব পৰা গৈছে৷ স্মৰ্তব্য যে মাত্ৰ দুদিন পূৰ্বে মুম্বাইৰ এক বিশেষ আদালতে নীৰৱ মোদীৰ ১৪০০ কোটিটকীয়া সম্পত্তি জব্দ কৰাৰ নিৰ্দেশ দিছিল৷
নীৰৱ মোদী বৰ্তমান লণ্ডনৰ কাৰাগাৰত৷ আৰু এণ্টিগুৱাৰ নাগৰিকত্ব লৈ তাতেই আত্মগোপন কৰি আছে মেহুল ছৌকচিয়ে৷