নিউজ ডেস্ক, ১০ ছেপ্তেম্বৰ : শুকুৰবাৰে পুৱাৰে পৰা সামাজিক মাধ্যমত চৰ্চিত হৈ পৰিছিল এটা নাম। সেই নামটো আছিল ভিক্টৰ দাসৰ। ইণ্টাৰনেট কৰ্তন কৰি ২৬ হাজাৰ পদৰ বাবে অনুষ্ঠিত কৰা পৰীক্ষাক লৈ টুইটযোগে বৃহস্পতিবাৰে সৰৱ হৈ পৰিছিল ভিক্টৰ। টুইটত ভিক্টৰে সদ্যসমাপ্ত এই পৰীক্ষাত অনিয়ম সংঘটিত হোৱা বুলি দাবী কৰিছিল।
ভিক্টৰৰ টুইটৰ পিছতে ৰাজ্যজুৰি সৃষ্টি হৈছিল আলোড়নৰ। সৰ্বত্ৰে একপ্ৰকাৰ হৈ-চৈ লাগে। আৰক্ষীৰ শীৰ্ষ পৰ্যায়ৰ বিষয়াসকলৰ মাজতো আৰম্ভ হয় লৰা-ঢপৰা।
জেৰাৰ পিছতে ভিক্টৰ দাসক গ্ৰেপ্তাৰ কৰা হব পাৰে বুলিও চৰ্চা চলিছিল। আৰু ২১ আৰু ২৮ আগষ্টত সমগ্ৰ অসমত অনুষ্ঠিত হোৱা প্ৰত্যক্ষ নিযুক্তি পৰীক্ষাৰ তৃতীয় আৰু চতুৰ্থ শ্ৰেণীৰ পদত বাছনিক লৈ মিছা উৰাবাতৰি প্ৰচাৰ কৰাৰ বাবে শুকুৰবাৰে গুৱাহাটী আৰক্ষীয়ে গ্ৰেপ্তাৰ কৰিলে ভিক্টৰ দাসক ।
টুইটাৰযোগে গুৱাহাটী আৰক্ষীয়ে কয়, “মিছা উৰাবাতৰি বিয়পোৱা আৰু চৰকাৰী পদলৈ বাছনিক লৈ সমাজৰ বিভিন্ন শ্ৰেণীৰ মাজত বিভেদ সৃষ্টি কৰাৰ ষড়যন্ত্ৰত লিপ্ত হোৱাৰ বাবে ভিক্টৰ দাসক গ্ৰেপ্তাৰ কৰা হৈছে।”
আৰক্ষীয়ে জেৰা কৰাৰ পিছত, দাসে তেওঁ ছ’চিয়েল মিডিয়াত প্ৰচাৰ কৰা তথ্যৰ কোনো প্ৰাসঙ্গিক প্ৰমাণ দাখিল কৰিব নোৱাৰিলে।
গুৱাহাটীত এটা প্ৰশিক্ষণ প্ৰতিষ্ঠানৰ গৰাকী ভিক্টৰ দাসে এটা টুইটযোগে দাবী কৰে যে “পিছফালৰ এপইণ্টমেণ্টৰ বাবে এটা বৃহৎ লবী চলি আছে” আৰু “মানুহে পোষ্টটোৰ ওপৰত নিৰ্ভৰ কৰি ৩ লাখৰ পৰা ৮ লাখলৈ ধন দাবী কৰি আছে”।
ৰাজ্যখনৰ মুখ্যমন্ত্ৰী সিংহ বিশ্ব শৰ্মা, ডিজিপি ভাস্কৰ জ্যোতি মহন্ত, বিশেষ ডিজিপি জিপি সিঙক টুইটাৰযোগে টেগ কৰি ভিক্টৰে লিখিছিল, “সন্মানীয় মহাশয়, শেহতীয়াকৈ অনুষ্ঠিত এডিআৰই পৰীক্ষাৰ পিছফালৰ নিযুক্তিৰ বাবে এটা বিশাল লবী চলি আছে য’ত মানুহে এই পদৰ ওপৰত নিৰ্ভৰ কৰি ৩ লাখৰ পৰা ৮ লাখলৈ ধন দাবী কৰি আছে, লগতে কেইজনমান প্ৰাক্তন বিধায়কজড়িত। অনুগ্ৰহ কৰি সহায় কৰক।”