কোন ৫ চেলিব্ৰেটীয়ে অস্বীকাৰ কৰিলে কপিল শর্মা শ্ব’ত অংশ ল’বলৈ?
ব্যংগ সম্ৰাট কপিল শৰ্মাৰ অনুষ্ঠানত অংশ ল’বলৈ অস্বীকাৰ ৫ প্ৰখ্যাত চেলিব্ৰেটীৰ। প্ৰত্যাখ্যান কৰিলে বাৰম্বাৰৰ নিমন্ত্ৰণ। কপিল শৰ্মাৰ অনুষ্ঠান টেলিভিচনৰ অন্যতম জনপ্ৰিয় অনুষ্ঠান। বলীউড তথা অন্য তাৰকাসকলে দ্য কপিল শৰ্মা শ্ব’ত অংশ লৈ প্ৰচাৰ কৰে তেওঁলোকৰ নতুন চলচ্চিত্ৰৰ। কিন্তু এনে কিছু চেলিব্ৰীতি আছে যিয়ে কপিল শৰ্মাৰ অনুষ্ঠানত অংশ লবলৈ অস্বীকাৰ কৰে।
কেইদিনমান পূৰ্বে দ্য কপিল শৰ্মা শ্ব’ত অংশ ল’বলৈ মতা হৈছিল এসময়ৰ জনপ্ৰিয় ধাৰাবাহিক ‘মহাভাৰত’ৰ কলা-কুশলীক। ‘মহাভাৰত’ত ভীষ্মৰ চৰিত্ৰ ৰূপায়ণ কৰি প্ৰখ্যাত হৈ পৰা মুকেশ খান্নাকো এই অনুষ্ঠানত অংশ ল’বলৈ আমন্ত্ৰণ কৰা হৈছিল। কিন্তু এই অনুষ্ঠানত অংশ ল’বলৈ অস্বীকাৰ কৰিছিল অভিনেতাজনে। অভিনেতা মুকেশ খান্নাৰ মতে, অনুষ্ঠানত দ্ব্যৰ্থক অৰ্থাৎ দুইধৰণৰ অৰ্থ বুজোৱা কথা কোৱা হয়। লগতে মহিলাসকলৰ প্ৰতিও বহু সময়ত অসন্মানজনক মন্তব্য কৰা হয়। কিন্তু এইক্ষেত্ৰত আপত্তি দৰ্শোৱাৰ পিছতো কপিল শৰ্মা আৰু তেওঁৰ টীমে কোনোধৰণৰ প্ৰতিক্ৰিয়া প্ৰকাশ কৰা নাছিল।
ছুপাৰষ্টাৰ ৰজনীকান্তৰ অনুগামীৰ সংখ্যা কিমান সকলোৱে জানে। অভিনেতা ৰজনীকান্তকো দ্য কপিল শৰ্মা শ্ব’ত অংশ ল’বলৈ বহুবাৰ আমন্ত্ৰণ কৰাৰ পিছতো এই অনুষ্ঠানত ল’বলৈ অস্বীকাৰ কৰি আহিছে দাক্ষিণাত্যৰ অতি জনপ্ৰিয় অভিনেতাজনে ।
ভাৰতৰ কোকিল কন্ঠী তথা প্ৰসিদ্ধ গায়িকা লতা মংগেশকাৰেও কপিল শৰ্মাৰ অনুষ্ঠানত অংশ ল’বলৈ অস্বীকাৰ কৰি আহিছে। প্ৰসিদ্ধ গায়িকাগৰাকীক বহুবাৰ এই অনুষ্ঠানত অংশ ল’বলৈ নিমন্ত্ৰণ জনোৱা হৈছিল যদিও তেওঁ বিনম্ৰতাৰে এই নিমন্ত্ৰণ প্ৰত্যাখ্যান কৰে।
‘ক্ৰিকেটৰ ভগৱান’ বুলি কোৱা শচীন তেণ্ডলকাৰেও তেওঁৰ আত্মজীৱনীখনৰ প্ৰমোচনৰ সময়তো দ্য কপিল শৰ্মা শ্ব’ত অংশ লোৱা নাছিল। জানিবলৈ পৰা মতে কপিল শৰ্মা অনুষ্ঠানৰ পূৰ্বৰ স্থায়ী অতিথি তথা ক্ৰিকেটাৰ নৱজোৎ সিং সিদ্ধুৱেও শচীনক আমন্ত্ৰণ জনাইছিল যদিও তেওঁ সেই অনুষ্ঠানত অংশ লোৱা নাই৷
পূৰ্বৰ ভাৰতীয় কেপ্তেইন মহেন্দ্ৰ সিং ধোনীয়েও এই অনুষ্ঠানত অংশ ল’বলৈ অস্বীকাৰ কৰিছিল। আনকি প্ৰয়াত সুশান্ত সিং ৰাজপুত অভিনীত ধোনীৰ আত্মজীৱনীমূলক চলচিত্ৰখনৰ প্ৰমোচনো তেওঁ বহু ঠাইত কৰিছিল যদিও দ্য কপিল শৰ্মা শ্ব’ত অংশ ল’বলৈ অস্বীকাৰ কৰিছিল। আনকি জানিব পৰা মতে তেওঁক সেই অনুষ্ঠানত অংশ ল’বলৈ লিখিতভাৱে মতা হৈছিল।