কলিয়াবৰবাসী ৰাইজক উৎফুল্লিত কৰিছে দুই আৰক্ষী বিষয়াই। উৎকৃষ্ট সেৱাৰ বাবে মুখ্যমন্ত্ৰীৰ আৰক্ষী পদক লাভ কৰিবলৈ সক্ষম হোৱা কলিয়াবৰ মহকুমা আৰক্ষী বিষয়া মৃণ্ময় দাস আৰু জখলাবন্ধা আৰক্ষী নিৱেশৰ ভাৰপ্ৰাপ্ত আৰক্ষী বিষয়া নিপু কলিতাক সম্বৰ্ধনা। দুয়োজনকে নগাঁও জিলা গোৰ্খা ছাত্ৰ সন্থাই জ্ঞাপন কৰে সম্বৰ্ধনা। উল্লেখযোগ্য যে, দুয়োগৰাকী আৰক্ষী বিষয়াই নিজৰ কৰ্মদক্ষতাৰে নিচাসুক্ত দ্ৰব্য, অবৈধ জুৱা আদিৰ বিৰুদ্ধে অভিযান চলাই লাভ কৰিছিল বিশেষ সফলতা। লগতে কাজিৰঙা ৰাষ্ট্ৰীয় উদ্যানৰ এশিঙীয়া গঁড় সুৰক্ষাৰ দিশতো এক গুৰুত্বপূৰ্ণ বিশেষ ভূমিকা পালন কৰি আহিছে দুয়োগৰাকী আৰক্ষী বিষয়াই।
তেওঁলোকৰ এই সফলতাই সমগ্ৰ কলিয়াবৰবাসী ৰাইজক উৎফুল্লিত কৰিছে আৰু সফলতাই অনাগত দিনত অধিক কৰ্মস্পৃহা আৰু উদ্যমৰে কাম কৰি যাবলৈ উদগনি যোগাব বুলি মত প্ৰকাশ কৰে ছাত্ৰ সন্থাৰ প্ৰতিনিধিসকলে। নগাঁও জিলা গোৰ্খা ছাত্ৰ সন্থাৰ কেইবাজনো সদস্যই আৰক্ষী থানাত উপস্থিত হৈ দুই আৰক্ষী বিষয়াক জ্ঞাপন কৰে সম্বৰ্ধনা।