ফেনে ফোটোকাৰে বাঢ়িছে বেঁকী নৈ, জনীয়া সমষ্টিৰ শতাধিক গাঁও জলমগ্ন

বৰপেটা জিলাৰ জনীয়া সমষ্টিত ক্ৰমাৎ ভয়াৱহ হৈ পৰিছে বেঁকী নৈৰ বানপানী। সঘনাই ভূটানৰ কুৰিছু বান্ধৰ পানী এৰি দিয়াৰ ফলত বেঁকী নৈৰ জলপৃষ্ঠ বৃদ্ধি হোৱাত সমষ্টি টোৰ  ন ন অঞ্চল প্লাৱিত হবলৈ আৰম্ভ কৰিছে। ইতিমধ্যে হেজাৰ হেজাৰ পৰিয়াল , পশুধন  পানীৰ মাজত আৱদ্ধ হৈ পৰিছে। ডুব গৈছে বানাক্ৰান্ত অঞ্চলৰ মীন পালন কৰা পুখুৰীবোৰ। ইয়াৰ মাজতে নিশা লাচাংগা নামে গাঁওখনত সৃষ্টি হয় এক হাহাকাৰময় পৰিস্থিতিৰ। কলগাছিয়া-টেঙাগাঁও গড়কাপ্তানী পথৰ ওপৰেদি পানী বাগৰাত আৰু লাচাংগা-মোৱামাৰী পথটো কেবা ঠাইত ছিগি যোৱাত কেবাটাও পৰিয়ালৰ ঘৰ পানীত বুৰ যায় ৷ গোটেই নিশা লাচাংগা গাঁৱৰ ৰাইজে বাঁহ, খেৰ, কলগছ আৰু বাঁহেৰে পথৰ লগতে নিজৰ ঘৰবাৰী ৰক্ষাৰ বাবে চেষ্টা চলায় । এইক্ষেত্ৰত বৰপেটা জিলা প্ৰশাসনে বানাক্ৰান্ত ৰাইজৰ খবৰ লোৱা দুৰৰে কথা বান-পানীত আৱদ্ধ হৈ থকা পৰিয়ালবোৰক উদ্ধাৰৰ বাবেও  কোনো ধৰণৰ ব্যৱস্থা গ্ৰহণ নকৰাৰ অভিযোগ কৰিছে। অতি সোনকালে বান পানীত আবদ্ধ হৈ থকা পৰিয়ালসমূহক উদ্ধাৰৰ বাবে দাবী জনাইছে  বানাক্ৰান্তই।