নিউজ ডেস্ক,৫আগষ্ট : অৱশেষত উদ্ধাৰ হ’ল ডিমা হাছাওৰ পৰা অপহৃত দুই কৰ্মচাৰী । ১০ দিন পিচত উদ্ধাৰ কৰিবলৈ সক্ষম হ’ল ডিমা হাছাওৰ মাহুৰৰ পৰা মণিপুৰৰ তামেংলংলৈ চলি থকা টু লেন পথ নিৰ্মাণত কৰ্মৰত কৰ্মচাৰী দুজনক ।অপহৰণকাৰীৰ কবলৰ পৰা উদ্ধাৰ হোৱা কৰ্মচাৰী দুজন হৈছে কৰিমগঞ্জ জিলাৰ অচিমগঞ্জৰ আব্দুল কাদিৰ আৰু হাইলাকান্দি জিলাৰ সহাবাদ গাঁৱৰ ইকবাল লস্কৰ ৷
উল্লেখ্য় যে, পথ নিৰ্মাণকাৰী অনুচা নামৰ কোম্পানীটোৰ কাম চলি থাকোতে যোৱা ২৬ জুলাইৰ নিশা ১০ মান বজাত ১০/১২ জনীয়া এটা অচিনাক্ত বন্দুকধাৰী দল শিবিৰত উপস্থিত হৈ কৰ্মচাৰী দুজনক অপহৰণ কৰিছিল । ইয়াৰ পিচতেই আৰক্ষীয়ে কৰ্মচাৰী দুজনৰ সন্ধানত অভিযান আৰম্ভ কৰে আৰু নিৰ্মাণ সংস্থাটোৱে পথ নিৰ্মাণৰ কাম বন্ধ কৰি দিয়ে(Two abducted employees rescued in Dima Hasao)।
দেওবাৰে নিশা অপহৃত দুই কৰ্মচাৰী উদ্ধাৰ কৰি হাফলঙলৈ আনে আৰক্ষীয়ে । এই দুজন কৰ্মচাৰীক উদ্ধাৰৰ বাবে আৰক্ষীয়ে অভিযান অব্যাহত ৰাখি অৱশেষত ১০ দিন পিচত অক্ষত অৱস্থাত উদ্ধাৰ কৰিবলৈ সক্ষম হয় ।
আৰক্ষীয়ে দুই অপহৃত কৰ্মচাৰীক উদ্ধাৰ কৰিছে যদিও বৰ্তমানলৈকে এই অপহৰণকাণ্ডৰ সৈতে কোন জড়িত হৈ আছে, সেই বিষয়ে কোনো তথ্য় লাভ কৰিবলৈ সক্ষম হোৱা নাই ।
লগতে পঢ়ক : Student missing in Jamugurihat : দিকৰাই চাহ বাগিছাৰ পৰা নিৰুদ্দেশ অষ্টম শ্ৰেণীৰ ছাত্ৰ