নিউজ ডেস্ক, ১ জুন: বৰ্তমান সময়ত সচৰাচৰ ৰাষ্টাতে হওক বা ঘৰত ৰখাই থোৱা হওক গাড়ী জ্বলা ঘটনা দেখা পোৱা গৈছে।
আজি নুমলীগড়ৰ কাষৰীয়া মৰঙী চাৰিআলিত ভয়াৱহ অগ্নিকাণ্ডৰ ঘটনা সংঘটিত হয়। সম্ভৱত এখন গাড়ীত চৰ্ট চাৰ্কিট হোৱাৰ ফলতে অগ্নিকাণ্ড হোৱাৰ সন্দেহ কৰা হৈছে।
পৰৱৰ্তী সময়ত স্থানীয় ৰাইজৰ তৎপৰতাত নিৰ্বাপিত হয় জুই। ঘটনাস্থলীত জুই নিৰ্বাপিত হোৱাৰ পিছতহে আৰক্ষী প্ৰশাসন আৰু অগ্নি নিৰ্বাপক বাহিনীৰ গাড়ী লোক উপস্থিত হয় ।
অগ্নিকাণ্ডত বিলাসী বাহনসহ আন দুখনকৈ গাড়ী জ্বলি ভষ্মীভূত হয়। স্থানীয় লোকৰ অনুমান অনুসৰি অগ্নিকাণ্ডত প্ৰায় ৪০ লক্ষ্যাধিক টকাৰ ক্ষতি হৈছে।
মৰঙী চাৰিআলিৰ মুষ্টিক আহমেদ নামৰ এজন লোকৰ গৃহত ৰখাই থোৱা এখন গাড়ীত জুই লগাৰ পিছতে এটা গৃহৰ লগতে এখন মেজিক গাড়ী, এখন বিলাসী মাৰুটি ব্ৰীজাৰ গাড়ী আৰু এখন চুপাৰ কেৰী বাহন সম্পূৰ্ণ ৰূপে জ্বলি চাৰখাৰ হয়। লগতে এটা ধান থকা ভঁৰাল ঘৰ,আৰু কিছু পৰিমাণে এটা বাসগৃহৰো ক্ষতি হয়।