কাজিৰঙাৰ বান পৰিস্থিতিক লৈ উদ্বিগ্ন ব্ৰিটিছ ৰাজকুমাৰ

কাজিৰঙা ৰাষ্ট্ৰীয় উদ্যানৰ শেহতীয়া ভয়াৱহ বান পৰিস্থিতিক লৈ উদ্বিগ্ন হৈ পৰিছে ব্ৰিটেইনৰ ৰাজকুমাৰ তথা ডিউক অৱ কেম্ব্ৰিজ উইলিয়াম৷ যুৱৰাজ উইলিয়ামে ২০১৬ চনত সপত্নীক কাজিৰঙা ভ্ৰমণ কৰি গৈছিল৷ মুগ্ধ হৈছিল কাজিৰঙাৰ সৌন্দৰ্য আৰু কাজিৰঙাবাসী ৰাইজৰ আতিথ্যত৷ কাজিৰঙাৰ প্ৰধান আকর্ষণ বিশ্ববিখ্যাত এশিঙীয়া গঁড়ৰ সৌন্দৰ্যও মুগ্ধ কৰিছিল যুৱৰাজ উইলিয়াম আৰু তেওঁৰ পত্নীক৷ সেই বিশ্ব ঐতিহ্যক্ষেত্ৰ কাজিৰঙা এতিয়া বাৰিষাৰ সংহাৰী বানৰ কৱলত৷ মৃত্যু হৈছে এশৰো অধিক বন্যপ্ৰাণী৷ প্ৰায় ১২টা গঁড়ৰ এইপৰ্যন্ত চলিত বাৰিষাৰ বানে প্ৰাণ লৈছে৷ ৰাষ্ট্ৰীয় উদ্যানখনৰ ৯৫ শতাংশ বনভূমি এতিয়াও পানীৰ তলত৷ কাজিৰঙাৰ এই জটিল পৰিস্থিতিক লৈ উদ্বিগ্নতা প্ৰকাশ কৰি যুৱৰাজ উইলিয়ামে এখন পত্ৰ লিখি পঠাইছে ৰাষ্ট্ৰীয় উদ্যানখনৰ সঞ্চালক পি শিৱ কুমাৰলৈ৷ পত্ৰখনত উইলিয়ামে এইবুলি উল্লেখ কৰিছে যে ধাৰাসাৰ বৰষুণৰ বাবে কাজিৰঙাত যি ভয়াৱহ বান পৰিস্থিতিৰ সৃষ্টি হৈছে সেই পৰিস্থিতিয়ে মোৰ আৰু মোৰ পত্নী কেথৰিনৰ হৃদয় ব্যাথিত কৰিছে৷ এই পত্ৰখনতে ৰাজকুমাৰ উইলিয়ামে স্মৰণ কৰিছে কাজিৰঙা ভ্ৰমণকালত নিজেই দেখি যোৱা বন্যপ্ৰাণীৰ সুৰক্ষাৰ হকে বনৰক্ষীসকলৰ কৰ্তব্যপৰায়ণতাৰ কথা৷ ক’ৰনা মহামাৰীৰ সংহাৰৰ মাজতে কাজিৰঙাত বান সৃষ্ট পৰিস্থিতিৰ সৈতে প্ৰত্যাহ্বানেৰে যুঁজ দিয়াসকলৰ প্ৰতি সহমৰ্মিতা প্ৰকাশ কৰিছে ব্ৰিটিছ যুৱৰাজে৷