Bongaigaon MLA Son work at petrol pump : পঢ়াৰ খৰচ উলিয়াবলৈ পেট্ৰল পাম্পত সোমাল বিধায়কৰ পুত্ৰই
নিউজ ডেস্ক, ২৪ জুন : দুবাৰকৈ বঙাইগাঁঁও সমষ্টিৰ ৰাইজে অসম বিধান সভালৈ নিৰ্বাচিত কৰি পঠাইছে অসম গণ পৰিষদৰ প্ৰাক্তন মন্ত্ৰী তথা বৰ্তমানৰ বিধায়ক ফণী ভূষণ চৌধুৰী(Bongaigaon MLA Son work at petrol pump) ।
বিধায়কৰ ঘৰত হাজাৰ হাজাৰ মানুহে সহায় বিচাৰি আহে তেনে ক্ষেত্ৰত দেখা গল বিধায়কৰ একমাত্ৰ পুত্ৰ শান্তনু ভূষণ চৌধুৰীয়ে স্নাতক পৰীক্ষা সম্পূৰ্ণ কৰি কলেজত নাম ভৰ্তিৰ বাবদ যিমানখিনি খৰচৰ প্ৰয়োজন হ’ব সেইখিনি নিজেই পেট্ৰল পাম্পত কাম কৰি উলিয়াই লব(MLA Son Working at Petrol Pump) ।
কিন্তু আজি হাতত তেলৰ পাইপ লৈ পেট্ৰল পাম্পত দেখা গ’ল মন্ত্ৰী ফণী ভূষণ চৌধুৰীৰ একমাত্ৰ পুত্ৰ শান্তনু চৌধুৰী।
আচলতে নিজৰ খৰচ নিজেই উলিয়াবলৈ ফণীভূষণ চৌধুৰীৰ পুত্ৰ শান্তনু চৌধুৰীয়ে নিজকে নিয়োজিত কৰিছে পেট্ৰ’ল পাম্পৰ কৰ্মচাৰী হিচাপে।
জানিব পৰা মতে, শান্তনুৱে স্নাতক ষষ্ঠ ষান্মাসিকৰ পৰীক্ষাত অৱতীৰ্ণ হৈছে । পৰীক্ষা শেষ হোৱাৰ পিছত ভৱিষ্যতৰ পঢ়াৰ খৰচ উলিয়াবলৈ পেট্ৰ’ল পাম্পত কাম কৰাৰ সিদ্ধান্ত গ্ৰহণ কৰিছে শান্তনুৱে ।
উল্লেখ্য যে শান্তনু ফণীভূষণ চৌধুৰীৰ একমাত্ৰ পুত্ৰ । ফণী ভূষণ চৌধুৰীৰ সৰলতা আৰু সহজ জীৱন যাপনৰ বিষয়ে সকলোৱে জানে। এতিয়া ডাঙৰ হৈ অহাৰ পিছত পিতৃৰ দৰেই সাধাৰণ জীৱন-যাপন কৰিবলৈ ভাল পায় শান্তনুৱে। সেয়েহে পৰীক্ষাৰ পিছত পেট্ৰ’ল পাম্পত কৰ্মচাৰী হিচাপে নিয়োজিত হয় শান্তনু।
এই বিষয়ে সোধাত শান্তনুৱে সংবাদ মাধ্যমৰ আগত কয় যে ”মোৰ দেউতাক সকলোৱে চিনি পায়, বঙাইগাঁও সমষ্টিৰ বিধায়ক তেওঁ । দেউতাই মোক পঢ়াৰ খৰচ দিব পাৰে, এডমিশ্যনৰ খৰচ দিব পাৰে, ডাঙৰ কথা নহয়। কিন্তু মই বিচাৰোঁ মই যাতে মোৰ নিজ উপাৰ্জনৰ টকাৰে এডমিশ্যন ল’ব পাৰো । দেউতাক যাতে গৌৰৱ অনুভৱ কৰাব পাৰো।”
লগতে শান্তনুৱে কয়, কামৰ কোনো সৰু-ডাঙৰ নাই। কাম কামেই । দেউতাই মোক সমৰ্থন কৰিছে। মই যদি নিজৰ খৰচখিনি উলিয়াব পাৰো, দেউতাই নিশ্চয় গৌৰৱ অনুভৱ কৰিব। যুৱ প্ৰজন্মক নিজৰ খৰচ নিজেই যাতে উলিয়াব পাৰে তাৰ বাবে সৰু-ডাঙৰ বিচাৰ নকৰি কাম কৰি যাবলৈ আহ্বান জনাইছে শান্তনুৱে।
লগতে পঢ়ক : Opposition Meeting In Patna : দাড়ি দীঘল নকৰি বিয়া পাতক; ৫৩ বছৰীয়া ৰাহুলক লালুৰ প্ৰস্তাৱ