নিউজ ডেস্ক,১১আগষ্ট : ৰাজ্যত পুনৰ নিৰুদ্দেশৰ ঘটনা । ৰাজ্যত দিনক দিনে বৃদ্ধি পাবলৈ ধৰিছে নিৰুদ্দেশৰ ঘটনা। ধাৰাবাহিকভাৱে সংবাদ মাধ্যমৰ শিৰোনামা দখল কৰি আহিছে নিৰুদ্দেশৰ ঘটনাই । এটাৰ পিছত আন এটা নিৰুদ্দেশৰ ঘটনাই জোকাৰি গৈছে ৰাজ্য।
চিৰাং জিলাৰ বাসুগাঁও চহৰৰ সমীপৰ বিজয়গাঁৱৰ পৰা এগৰাকী ১২ বছৰীয়া কিশোৰ নিৰুদ্দেশ । নিৰুদ্দেশ হোৱা কিশোৰগৰাকী বিজয়গাঁও-মালিপাৰা গাঁৱৰ বাসিন্দা দেব সৰকাৰ আৰু দুৰ্গা সৰকাৰ বৰপুত্ৰ সৰজীৱ সৰকাৰ ওৰফে সঞ্জীৱ সৰকাৰ (১২) বুলি জানিব পৰা গৈছে(Teenage boy missing in Chirang)।
পৰিয়ালৰ লোকে জনোৱা অনুসৰি ১৭ জুলাই, বুধবাৰে দুপৰীয়া ২-০০ বজাত পৰিয়ালৰ অজ্ঞাতে ঘৰৰ পৰা ওলাই গৈছিল । ওলাই যোৱা দিনৰে পৰা কিশোৰজন আজিলৈকে সন্ধানহীন হৈ আছে ।
ওচৰ চুবুৰীয়া প্ৰত্যক্ষ কৰা অনুসৰি সঞ্জীৱ ঘৰৰ পৰা ওলাই যোৱাৰ সময়ত ক’লা ৰঙৰ হাফপেন্ট আৰু ক’লা-বগা টী-চাৰ্ট পিন্ধি আছিল । প্ৰথমে পৰিয়ালৰ লোকে নিজাববীয়াকৈ অনুসন্ধান কৰে যদিও নিৰুদ্দেশ কিশোৰজনৰ কোনো ধৰনৰ শুংসূত্ৰ উলিয়াব নোৱাৰি পৰিয়ালৰ লোকে বাসুগাঁও থানাত নিৰুদ্দেশ সম্পৰ্কীয় গোচৰ পঞ্জীয়ন কৰে ।পৰিয়ালৰ লোকে সদৰীকৰা মতে ছমাহ আগতে নয়টামাৰা গাঁৱৰ ভোলা বৰ্মন নামৰ এজন দায়িত্বহীন ব্যক্তিৰ প্ৰচৰণাত তামোল গছত উঠি দুৰ্ঘটনা পতিত হৈ তলত পৰি কিশোৰজনৰ মূৰ তথা কপালত আঘাতপ্ৰাপ্ত হৈ বহুদিন চিকিৎসাধীন হৈ আছিল । কিশোৰজনৰ কপালত আঘাতৰ চিন স্পষ্ট আছে।
উক্ত দুৰ্ঘটনাৰ পিছত কিশোৰজনৰ মানসিক স্থিতি সম্পূৰ্ণ নাছিল। কোনো সদাশয় ব্যক্তিয়ে যদি নিৰুদ্দেশ কিশোৰজনৰ সন্ধান লাভ কৰে তেনেহ’লে ওচৰৰ আৰক্ষী থানা বা ৯৩৯৫২৫৪০২৮ মোৱাইল নম্বৰত যোগাযোগ কৰিবলৈ আহ্বান জনাইছে(Teenage boy missing in Chirang)।