নিউজ ডেস্ক,২২আগষ্ট : খোৱাপানীৰ টেংকীত দুষ্টচক্ৰই মিহলি কৰিলে সন্দেহজনক ৰাসায়নিক দ্ৰব্য।
তিনিচুকীয়া জিলাৰ ফিল’বাৰীৰ আমগুৰি গাঁৱত সংঘটিত হৈছে চাঞ্চল্যকৰ ঘটনাৰ ।আমগুৰি গাঁৱত এগৰাকী লোকৰ ঘৰৰ খোৱাপানীৰ টেংকীত দুষ্টচক্ৰই মিহলি কৰিলে সন্দেহজনক ৰাসায়নিক দ্ৰব্য । ঘটনাক কেন্দ্ৰ কৰি অঞ্চলজুৰি সৃষ্টি হয় তীব্ৰ উত্তেজনাৰ(Sensational incident in Tinsukia)।
জানিব পৰা মতে, আমগুৰি গাঁৱৰ গাঁওৰক্ষী বাহিনীৰ সভাপতি ৰামজী শৰ্মা নামৰ লোকজনৰ বাসগৃহত সংঘটিত হয় এই ঘটনাটো ।
ভুক্তভোগী ৰামজী শৰ্মাই জনোৱা মতে, বিশেষ কামৰ বাবে তেওঁৰ পৰিয়ালটো ঘৰৰ বাহিৰত আছিল । তেওঁৰ পত্নীয়ে সন্তানক বিদ্যালয়ৰ পৰা আনিবলৈ যোৱাৰ সময়তে কোনো দুষ্টচক্ৰই এই অমানৱীয় ঘটনা সংঘটিত কৰাৰ সন্দেহ কৰা হৈছে । পত্নীয়ে ঘৰলৈ উভতি আহি পানীৰ টেপটো খুলি আচৰিত হৈ পৰে । টেপৰ পৰা দুৰ্গন্ধময় আৰু লেতেৰা পানী ওলোৱাৰ লগে লগে পৰিয়ালটোৰ হাহাকাৰ লাগিল । তেতিয়া তেওঁলোকে পানীৰ টেংকী পৰীক্ষা কৰে আৰু সমগ্ৰ ঘটনাটো পোহৰলৈ আহে । খবৰ পোৱাৰ লগে লগে অঞ্চলটোৰ লোকসকল ৰামজীৰ ঘৰত উপস্থিত হয়(Sensational incident)।
ঘটনাটোৰ খবৰ ফিল’বাৰী আৰক্ষীক অৱগত কৰা হয় । আৰক্ষীয়ে ঘটনাৰ খবৰ পোৱাৰ পিচতে ৰামজীৰ ঘৰত উপস্থিত হয় আৰু ঘটনাৰ তদন্ত আৰম্ভ কৰে । ঘটনাটোৰ পিচতে ৰামজীৰ পৰিয়ালটো আতংকিত হৈ পৰিছে । ভুক্তভোগী ৰামজীয়ে অভিযোগ কৰা মতে তেওঁৰ পৰিয়ালটোক কোনো লোকে হত্যা কৰাৰ ষড়যন্ত্ৰ কৰিছিল ।
যাৰ বাবে এই ক্ষেত্ৰত স্থানীয় ৰাইজ আৰু প্ৰশাসনৰ সহযোগিতা বিচাৰিছে পৰিয়ালটোৱে । দোষীক চিনাক্ত কৰি কঠোৰ শাস্তিৰো দাবী কৰিছে ৰামজী শৰ্মাৰ পৰিয়ালে । অৱশ্যে কোনে এই ঘটনা সংঘটিত কৰিলে ? ব্যক্তিগত শত্ৰুতা নে আন কাৰণ? আৰক্ষীৰ তদন্তৰ পিচত হে সকলো তথ্য পোহৰলৈ আহিব ।