President Droupadi Murmu arrives in New Zealand to boost bilateral ties : নিউজীলেণ্ডত ৰাষ্ট্ৰপতি দ্ৰৌপদী মুৰ্মুক উষ্ম আদৰণি
ইণ্টাৰনেশ্যনেল ডেস্ক, ৮ আগষ্ট : নিউজীলেণ্ডত উপস্থিত ভাৰতৰ ৰাষ্ট্ৰপতি দ্ৰৌপদী মুৰ্মু । নিউজীলেণ্ডত উপস্থিত হোৱাৰ পিচতে গভৰ্ণৰ জেনেৰেল ডেম চিণ্ডি কিৰোৱে ভাৰতৰ ৰাষ্ট্ৰপতি দ্ৰৌপদী মুৰ্মুক উষ্ম আদৰণি জনায় । ৱেলিংটনত পৰম্পৰাগত মাওৰি ‘পাউহিৰি’ অনুষ্ঠানৰ জৰিয়তে আদৰণি জনোৱা হয় ভাৰতৰ ৰাষ্ট্ৰপতিগৰাকীক । ৰাষ্ট্ৰপতিগৰাকীক ‘‘গাৰ্ড অফ অ’নাৰ’’ প্ৰদান কৰা হয়(President Droupadi Murmu arrives in New Zealand to boost bilateral ties) ।
এক্সৰ এটা পোষ্টত বৈদেশিক পৰিক্ৰমা মন্ত্ৰালয়ৰ চৰকাৰী মুখপাত্ৰ ৰণধীৰ জয়ছোৱালে কয়, “ভাৰত-নিউজীলেণ্ডৰ অংশীদাৰিত্বক উজ্জীৱিত কৰা ! ৰাষ্ট্ৰপতি দ্ৰৌপদী মুৰ্মুক ৱেলিংটনৰ চৰকাৰী বাসভৱনত নিউজীলেণ্ডৰ গভৰ্ণৰ জেনেৰেল ডেম চিণ্ডি কিৰোৱে উষ্ম আদৰণি জনায় ।
জয়ছোৱালে লগতে কয় যে চৰকাৰী ভ্ৰমণৰ উদ্দেশ্যে ভাৰতৰ ৰাষ্ট্ৰপতিগৰাকী নিউজীলেণ্ডৰ ৱেলিংটনত উপস্থিত হয় । নিউজীলেণ্ডৰ নেতৃত্বৰ সৈতে ৰাষ্ট্ৰপতি মুৰ্মুৰ গুৰুত্বপূৰ্ণ আলোচনাৰ লক্ষ্য হৈছে দুয়োখন ৰাষ্ট্ৰৰ মাজৰ সম্পৰ্কক উৎসাহিত কৰা ।
বুধবাৰে ৰাষ্ট্ৰপতি মুৰ্মু তেওঁৰ তিনিখন দেশৰ ভ্ৰমণৰ দ্বিতীয় পৰ্যায় হিচাপে নিউজীলেণ্ডত উপস্থিত হয় । তেওঁক অকলেণ্ডত নিউজীলেণ্ডৰ বাণিজ্যিক মন্ত্ৰী টড মেকক্লে আৰু নিউজীলেণ্ডত ভাৰতৰ পৰৱৰ্তী উচ্চায়ুক্ত নীতা ভূষণে আদৰণি জনায়(President Murmu’s New Zealand Visit) ।
এক্সৰ এটা পোষ্টত নিউজীলেণ্ডৰ ভাৰতীয় দূতাবাসে কয়, “আজি নিউজীলেণ্ডত উপস্থিত হোৱাৰ লগে লগে দ্ৰৌপদী মুৰ্মুক উষ্ম আদৰণি জনাইছো । টড মেকক্লেয়ে ৰাষ্ট্ৰপতি মুৰ্মুক নিউজীলেণ্ডলৈ আদৰণি জনাইছিল । তেওঁ উল্লেখ কৰে যে ৰাষ্ট্ৰপতি মুৰ্মুৰ এই ভ্ৰমণ দুয়োখন ৰাষ্ট্ৰৰ মাজৰ সম্পৰ্ক গভীৰ কৰাৰ বাবে শেহতীয়াকৈ বহুতো চৰকাৰী ভ্ৰমণৰ ভিতৰত অন্যতম ।
এক্সৰ পোষ্টত টড মেকক্লেয়ে কয়, “নিউজীলেণ্ড চৰকাৰৰ হৈ ভাৰতৰ ৰাষ্ট্ৰপতিক আজি নিউজীলেণ্ডলৈ স্বাগতম জনোৱাৰ বাবে গৌৰৱান্বিত । এই ভ্ৰমণ আমাৰ সম্পৰ্ক গভীৰ কৰাৰ বাবে আৰু আমাৰ শক্তিশালী জনসাধাৰণৰ মাজত আৰু সাংস্কৃতিক সম্পৰ্ক বৃদ্ধি কৰাৰ বাবে শেহতীয়াকৈ হোৱা বহুতো চৰকাৰী ব্যস্ততাৰ ভিতৰত অন্যতম ।”
চৰকাৰী ভ্ৰমণকালত ৰাষ্ট্ৰপতি মুৰ্মুৱে নিউজীলেণ্ডৰ প্ৰধানমন্ত্ৰী ক্ৰিষ্টোফাৰ লাক্সনৰ সৈতে এখন বৈঠকত মিলিত হ’ব আৰু এখন শৈক্ষিক সন্মিলন সম্বোধন কৰিব । ভাৰতীয় সম্প্ৰদায় আৰু বন্ধুবৰ্গৰ সৈতে বাৰ্তালাপো কৰিব বুলি বৈদেশিক পৰিক্ৰমা মন্ত্ৰালয়ে জনায় । বুধবাৰে ৰাষ্ট্ৰপতি মুৰ্মুৱে ফিজিৰ নদীৰ শ্ৰী শিৱ সুব্ৰমনিয়া স্বামী মন্দিৰ দৰ্শন কৰে ।
তেওঁ এক অনুষ্ঠানত ফিজিত ভাৰতীয় সম্প্ৰদায়ক সম্বোধন কৰে আৰু ভাৰত আৰু ফিজিৰ মাজত দীৰ্ঘদিনীয়া সম্পৰ্কক প্ৰশংসা কৰে আৰু দ্বীপৰাষ্ট্ৰখনত প্ৰবাসী ভাৰতীয়সকলৰ ভূমিকাক সমগ্ৰ বিশ্বৰ বাবে অনুপ্ৰেৰণাৰ উৎস বুলিও অভিহিত কৰে ।
বৈদেশিক পৰিক্ৰমা মন্ত্ৰালয়ে জনোৱা অনুসৰি ৰাষ্ট্ৰপতি মুৰ্মু দেওবাৰে নতুন দিল্লীৰ পৰা ৬ দিনীয়া কাৰ্যসূচীৰে ফিজি, নিউজীলেণ্ড আৰু তিমুৰ-লেষ্টে অভিমুখে যাত্ৰা আৰম্ভ কৰে । ভ্ৰমণৰ অন্তিম পৰ্যায়ত ৰাষ্ট্ৰপতি মুৰ্মুয়ে ৰাষ্ট্ৰপতি জ’ছ ৰামোছ-হৰ্টাৰ আমন্ত্ৰণত তিমুৰ লেষ্টলৈ যাত্ৰা কৰিব । ১০ আগষ্টত তেওঁৰ এই ভ্ৰমণ সামৰিব ।