ডিজিটেল ডেস্ক: আগন্তুক বাজেটত কৰ হ্ৰাসৰ সম্ভাৱনা।
কেন্দ্ৰ চৰকাৰে ইংগিত দিছে যে, আয়কৰৰ ক্ষেত্রত ডাঙৰ পৰিৱৰ্তন ঘটোৱা হ’ব। কেন্দ্ৰীয় বাজেট ২০২৩ত আয়কৰ গাঁথনিৰ ডাঙৰ পৰিৱৰ্তন। কৰৰ বোজা কমি যাব বুলিও আশা কৰা হৈছে। ফলত সাধাৰণ মানুহ উপকৃত হ’ব।
কেন্দ্ৰীয় বাজেট ২০২৩ত আয়কৰৰ গাঁথনিত ডাঙৰ পৰিৱৰ্তন হ’ব পাৰে। সূত্ৰ অনুসৰি এই বাজেটত সাধাৰণ জনতাৰ আয়কৰৰ বোজা কমাব পৰা যাব। ইতিমধ্যে কেন্দ্ৰীয় চৰকাৰে এই পৰিকল্পনা কাৰ্যকৰী কৰাৰ কাম আৰম্ভ কৰিছে। বিকল্প কৰ ব্যৱস্থাটোক অধিক আকৰ্ষণীয় কৰি তুলিবলৈ নতুন স্লেব বা কৰ গাঁথনি কেনেকুৱা হ’ব তাৰ ব্লুপ্ৰিণ্টো প্ৰস্তুত কৰা হৈছে।
নিউজ এজেন্সী ৰয়টাৰে এটা সূত্ৰৰ উদ্ধৃতি দি এই খবৰ প্ৰকাশ কৰিছে। অৱশ্যে এই পৰিকল্পনা ৰূপায়ণৰ ক্ষেত্ৰত চূড়ান্ত সিদ্ধান্ত ল’ব প্ৰধানমন্ত্ৰীৰ কাৰ্যালয়ে। উল্লেখ্য যে, ২০২০ চনৰ আৰম্ভণিতে চৰকাৰে কৰ দাখিলৰ প্ৰক্ৰিয়া সৰলীকৰণৰ বাবে বিকল্প আয়কৰ ব্যৱস্থা প্ৰৱৰ্তন কৰিছিল। আৰু সেই কৰ ব্যৱস্থাই কম আয়ৰ লোকৰ বাবে সুবিধা ঘোষণা কৰিছিল। কিন্তু জনপ্ৰিয়তা লাভ কৰা নাছিল।
এতিয়া অভিযোগ কৰা হৈছে যে এই আয়কৰ গাঁথনিয়ে প্ৰায় ৭০টা মৌলিক ৰেহাইৰ অনুমতি নিদিয়ে। কিন্তু এই সুবিধা পুৰণি কৰ ব্যৱস্থাত উপলব্ধ আছিল। ইফালে চৰকাৰী সূত্ৰৰ উদ্ধৃতি দি ৰয়টাৰে প্ৰকাশ কৰিছে যে নতুন আয়কৰ ব্যৱস্থাত ৰেহাই দিয়াৰ ফলত ব্যৱস্থাটো অধিক জটিল হ’ব বুলি সেই সময়ত চৰকাৰে উপলব্ধি কৰা নাছিল।