Air India Official Slapped : বিমানত জ্যেষ্ঠ বিষয়াক যাত্ৰীৰ অসভ্য আচৰণ, শোধালে চৰ
নেশ্যনেল ডেস্ক, ১৬ জুলাই : বিগত কিছুদিন ধৰি বিভিন্ন ঘটনাৰাজিৰ বাবে প্ৰায়েই চৰ্চালৈ আহিছে এয়াৰ ইণ্ডিয়া(Air India Official Slapped)। যাত্ৰীৰ ওপৰত সুৰাপায়ী সহযাত্ৰীৰ প্ৰস্ৰাৱ কাণ্ডকে ধৰি শাৰীৰিক আক্ৰমণলৈ নানা ঘটনাই দখল কৰিছে সংবাদ শিৰোনাম। এইবাৰ পোহৰলৈ আহিছে বিমান প্ৰতিষ্ঠানটোৰ এগৰাকী জ্যেষ্ঠ বিষয়াক এগৰাকী যাত্ৰীয়ে কৰা অসভ্য আচৰণৰ খবৰ(Air India Official Slapped) ।
যোৱা ৯ জুলাইত ছিডনীৰ পৰা নতুন দিল্লী অভিমুখে আহি থকা এখন বিমানত এগৰাকী যাত্ৰীয়ে এয়াৰ ইণ্ডিয়াৰ এগৰাকী জ্যেষ্ঠ বিষয়াক চৰ শোধোৱাৰ লগতে তীব্ৰ গালি-গালাজ কৰে(Abused By Co-Passenger On Sydney-Delhi Flight)। এয়াৰ ইণ্ডিয়াই এক বিবৃতি যোগে এই ঘটনাৰ বিষয়ে সদৰী কৰিছে।
বিবৃতিটোত এয়াৰ ইণ্ডিয়াই উল্লেখ কৰা অনুসৰি , বিমানখনৰ যাত্ৰাৰ সময়ত এগৰাকী যাত্ৰীয়ে মৌখিক আৰু লিখিত সতৰ্কবাণী দিয়াৰ পিছতো উচ্চ স্বৰে অগ্ৰহণযোগ্য আচৰণ কৰিছিল আৰু ইয়াৰ ফলত বিমানৰ আন যাত্ৰীসকল তথা কৰ্মচাৰীসকল অসুবিধাৰ সন্মুখীন হৈছিল।
যাত্ৰীগৰাকীক বিমানৰ পাঁচগৰাকী যুৱ কেবিন কৰ্মচাৰীয়ে বাধা দিয়াৰ চেষ্টা কৰে যদিও বিফল হয় যুৱ কৰ্মচাৰীসকল । পৰিস্থিতি উত্তপ্ত হৈ পৰাৰ বাবে বিমানখনৰ বিজনেছ শ্ৰেণীত থকা জ্যেষ্ঠ বিষয়াগৰাকী সেই স্থানলৈ আহে আৰু যাত্ৰীগৰাকীক শান্ত কৰাবলৈ চেষ্টা কৰে।
জ্যেষ্ঠ বিষয়াগৰাকীয়ে যাত্ৰীগৰাকীক উচ্চ স্বৰত কথা নক’বলৈ অনুৰোধ জনোৱাৰ সময়তে যাত্ৰীগৰাকীয়ে তেওঁক চৰ শোধায় তথা মূৰত আঘাত কৰে আৰু অশ্ৰাব্য গালি-গালাজো কৰে । বিমানখনে দিল্লীত অৱতৰণ কৰাৰ পিছতে অভিযুক্ত যাত্ৰীগৰাকীক নিৰাপত্তা সংস্থাৰ হাতত গতাই দিয়া হয় ।
এয়াৰ ইণ্ডিয়াই লগতে উল্লেখ কৰে যে, ঘটনা সন্দৰ্ভত পিছত যাত্ৰীগৰাকীয়ে লিখিতভাৱে ক্ষমা বিচাৰে। এই ঘটনাৰ বিষয়ে বিমান নিয়ন্ত্ৰক অসামৰিক বিমান পৰিবহণ সঞ্চালকালয়ক অৱগত কৰা হৈছে বুলিও এয়াৰ ইণ্ডিয়াই জানিবলৈ দিয়ে।
সংস্থাটোৱে লগত ঘটনা সন্দৰ্ভত আইনী ব্যৱস্থা গ্ৰহণ কৰা হ’ব বুলিও উল্লেখ কৰিছে ।
লগতে পঢ়ক : Lionel Messi : গুৰুতৰ পথ দুৰ্ঘটনাৰ পৰা ৰক্ষা পৰিল লিঅ’নেল মেছি