নিউজ ডেস্ক, ১০ মে’- এফালে বিজেপিৰ প্ৰথম বৰ্ষপূৰ্তিৰ বাবে বিশেষ অনুষ্ঠান, আনফালে সাধাৰণ জনতাৰ গাড়ীলৈ বুলি প্ৰখৰ ৰদত বহু সময় ধৰি অপেক্ষা।
এফালে মন্ত্ৰী, বিধায়ক আহে আৰু আনফালে জনসাধাৰণৰ হাৰাশাস্তি। প্ৰধানমন্ত্ৰী অহাৰ দিনাৰ দৰেই অভাৱনীয় পৰিস্থিতি আজিও পৰিলক্ষিত হৈছে।
ষ্টপেজতো গাড়ী ৰখাব নোৱাৰা পৰিস্থিতি। যি এখন দুখন বাছ আহিছে তাতো মানুহৰ ভিৰ। উবেৰ, ৰেপিডʼ পাবলৈ নাই যি এখন বা দুখন আছে তাতো ভাড়া দুগুণ বৃদ্ধি।
মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন বিজেপি মিত্ৰজোঁট চৰকাৰৰ আজি প্ৰথম বৰ্ষপূৰ্তি। বিজেপি চৰকাৰৰ বৰ্ষপূৰ্তি উপলক্ষে খানাপাৰৰ পশু চিকিৎসা মহাবিদ্যালয়ৰ খেলপথাৰত আয়োজন কৰা হৈছে বিশেষ অনুষ্ঠানৰ ।
আজিৰ এই বিশেষ অনুষ্ঠানত মুখ্য অতিথি হিচাপে অংশগ্ৰহণ কৰিব কেন্দ্ৰীয় গৃহ মন্ত্ৰী অমিত শ্বাহে। যাকে লৈ খানাপাৰৰ লগতে সমগ্ৰ গুৱাহাটী আৰু ৰাজ্যতো এক বিশেষ পৰিৱেশ। বিজেপি নেতাৰ লগতে কৰ্মকৰ্তা সকলৰো মাজত দেখা পোৱা গৈছে ভীষণ ব্যস্ততা।
এই সকলোবেৰৰ বিপৰীতে মহানগৰত দেখা দিছে এক বিপৰীত দৃশ্য। বিজেপিৰ বিশেষ অনুষ্ঠানৰ বিপৰীতে প্ৰখৰ ৰʼদত জলাকলা খুৱাইছে সাধাৰণ জনতাক । যাত্ৰীসকলে বাছ ষ্টপত ঘন্টাৰ পিছত ঘণ্টা ধৰি অপেক্ষা কৰিব লগা হৈছে, আনকি বহু সময় ধৰি অপেক্ষা কৰিয়ো নাই যাতায়তৰ বাবে বাহন।