নিউজ ডেস্ক,১ছেপ্তেম্বৰ : এজাক বৰষুণ আহিলেই এতিয়া চিন্তিত হৈ পৰে গুৱাহাটী মহানগৰবাসী । কিয়নো বৰষুণ আহিলেই কৃত্ৰিম বানত বুৰ যায় অভিজাত মহানগৰীৰ অভিজাত্য । মাত্ৰ এজাক বৰষুণতে প্লাৱিত হয় মহানগৰীৰ প্ৰায়ভাগ অঞ্চল । ঠায়ে ঠায়ে এককাল, এবুকুলৈ বাঢ়ে পানী । বৰষুণ আহিলেই যেন জলবন্দী হৈ পৰে মহানগৰীৰ বহু অঞ্চলৰ জনতা ! গুৱাহাটী মহানগৰীত কৃত্ৰিম বানৰ সমস্যা দিনক দিনে ত্ৰমাৎ বৃদ্ধি পাবলৈ ধৰিছে(Guwahati Artificial Flood)।
পুনৰ জলমগ্ন গুৱাহাটী মহানগৰ ।দেওবাৰে পুৱাৰে পৰা ধাৰাসাৰ বৰষুণে পুনৰ ডুবালে গুৱাহাটী মহানগৰীক । এক সাগৰ সদৃশ পৰিৱেশ বিৰাজ কৰিছে অভিজাত মহানগৰীত । কৃত্ৰিম বানত সীমাহীন দুৰ্দষাত ভুগিছে মহানগৰবাসীয়ে । শনিবাৰৰ নিশা তথা দেওবাৰে পুৱাৰে পৰা হয় মুষলধাৰ বৰষুণজাকত কৃত্ৰিম বানত বুৰ যায় মহানগৰী ।
মহানগৰীৰ চানমাৰি, নুনমাটি, বামুনীমৈদাম, উলুবাৰী, নমাইল, যোৰাবাট, জু-ৰোড, ৰাজগড়, ৰুক্মিণী গাঁও, হাতীগাঁও, বেলতলা, গণেশগুৰি, গান্ধীবস্তি, পুৱ শৰণীয়া, পাঞ্জাবাৰী, অনিল নগৰ, নবীন নগৰকে ধৰি মহানগৰীৰ বিভিন্ন অঞ্চল কৃত্ৰিম বানত বুৰ যায় । ঠায়ে ঠায়ে একাঠু পৰ্যন্ত পানী হোৱা পৰিলক্ষিত হৈছে । আনকি এই কৃত্ৰিম বানৰ ফলত ব্যাহত হৈ পৰিছে স্বাভাৱিক জনজীৱন ।
লক্ষ্যণীয় বিষয় যে মহানগৰীৰ কৃত্ৰিম বান ৰোধৰ কৰিবলৈ নলা-নৰ্দমা নিষ্কাষণৰ বাবে অত্যাধুনিক যন্ত্ৰ চৰকাৰে ব্যৱহাৰ কৰিছে যদিও মহানগৰীৰ কৃত্ৰিম বান ৰোধত যেন ব্যৰ্থ হৈছে ।
গুৱাহাটী উন্নয়ন মন্ত্ৰী অশোক সিংহালে মহানগৰীৰ বানপ্ৰৱণ এলেকা পৰিদৰ্শন কৰিছে যদিও কৃত্ৰিম বান ৰোধ কৰাত ব্যৰ্থ হৈছে । ইয়াৰ বিপৰীতে বিভাগীয় মন্ত্ৰীয়ে মহানগৰীৰ কৃত্ৰিম বান কি দৰে সমাধান কৰিব সেই কথা চিন্তা নকৰি মহানগৰীৰ কৃত্ৰিম বানক লৈ উপলুঙা মন্তব্য কৰি অহাহে পৰিলক্ষিত হৈছে(Guwahati Artificial Flood)।