Assam | Doomdooma news : ডুমডুমাত মহিলা নেত্ৰী আৰু লাচিত সেনাৰ নেতাৰ বিৰুদ্ধে ৰাজহুৱা সভা
ডুমডুমা: সোমবাৰে ডুমডুমা শাখা সাহিত্য সভা ভৱনত অনুষ্ঠিত এক ৰাজহুৱা সভাত ডুমডুমাৰ জন জীৱনক অস্থিৰ কৰি ৰখাৰ অভিযোগ আনি ডুমডুমাৰ এগৰাকী মহিলা সমিতিৰ সভানেত্ৰী আৰু বীৰ লাচিত সেনাৰ ডুমডুমাৰ এগৰাকী নেতাৰ বিৰুদ্ধে কেইবাটাও গুৰুত্বপূৰ্ণ ৰাজহুৱা প্ৰস্তাৱ গ্ৰহণ কৰাৰ দৰে এক ঘটনা ঘটিছে।
বিগত প্ৰায় ২০ বছৰ ধৰি ডুমডুমা মহিলা সমিতিৰ সভানেত্ৰীৰ পদত অধিষ্ঠিত থকা ববী বৰা আৰু ডুমডুমাৰ বীৰ লাচিত সেনাৰ নেতা অভিশেষ বৰাৰ বিৰুদ্ধে ডুমডুমাৰ প্ৰায় ২০ টাকৈ জাতীয়-জনগোষ্ঠীয় আৰু সামাজিক অনুষ্ঠানে সামাজিক ভাৱে অসহযোগ কৰাৰ সিদ্ধান্ত গ্ৰহণ কৰিছে। ডুমডুমাৰ জাতীয়-জীৱনত গুৰুত্বপূৰ্ণ ভূমিকা পালন কৰি অহা দল-সংগঠন, অনুষ্ঠান-প্ৰতিষ্ঠান আৰু বিশিষ্ট ব্যক্তি সকলৰ লগতে প্ৰায় দুই শতাধিক লোকে উপস্থিত থকা ৰাজহুৱা সভাখন পৌৰহিত কৰে তিনিচুকীয়া জিলা লেখিকা সমাৰোহৰ সভানেত্ৰী ড০ মিনাদেৱী বৰুৱাই।
ডুমডুমা শাখা শতদল সাহিত্য সভাৰ সভাপতি দেবেন ডেকাই সভাখন আঁত ধৰি তেওঁৰ বিৰুদ্ধে আৰু ডুমডুমাৰ সামাজিক অনুষ্ঠান-প্ৰতিষ্ঠানৰ বিৰুদ্ধে ববী বৰাই এটা চেটেলাইট চেনেলৰ মাধ্যমেৰে বিভিন্ন মিছা অভিযোগ, অশালীন মন্তব্য আৰু তুচ্য-তাচিল্য কৰি তেওঁক আৰু ডুমডুমাবাসীক জনমানসত ভাৱমূৰ্তি ম্লান কৰাৰ চেষ্টা কৰা লগতে বিভিন্ন সময়ত অপ্ৰৰোচিত ভাৱে সামাজিক মাধ্যমত ডুমডুমাৰ সামাজিক অনুষ্ঠান আৰু বিশিষ্ট ব্যক্তি সকলৰ বিৰুদ্ধে গোৱাল গালি, অশালীন বাক্যবান আদি কৰি ডুমডুমাৰ সামাজিক পৰিৱেশ বিনষ্ট কৰাৰ অভিযোগ আনে।
ইয়াৰ লগে লগে সভাত উপস্থিত কেইবাগৰাকী বিশিষ্ট ব্যক্তিয়ে ববী বৰা আৰু অভিশেষ বৰাৰ বিৰুদ্ধে বিভিন্ন সময়ত অশালীন ব্যৱহাৰ, অপ্ৰয়োজনীয় কাৰ্য্যকলাপৰ জৰিয়তে ডুমডুমাৰ সামাজিক পৰিৱেশ বিনষ্ট কৰাৰ চেষ্টা কৰি থকাৰ গুৰুত্বৰ অভিযোগ আনি নেতা দুগৰাকীৰ বিৰুদ্ধে ৰাজহুৱা গৰিহণা প্ৰস্তাৱ গ্ৰহণ কৰে। ইয়াৰ লগতে তেওঁলোকৰ বিৰুদ্ধে সামাজিক ভাৱে অসহযোগৰ প্ৰস্তাৱ গ্ৰহণ কৰে। আনহাতে সভাই প্ৰয়োজন সাপেক্ষে ববী বৰাৰ বিৰুদ্ধে মানহানী গোচৰ তৰাৰ প্ৰস্তাৱ গ্ৰহণ কৰে।
সাম্প্ৰতিক সঘনাই বিতৰ্কৰ আবৰ্তত থকা বীৰ লাচিত সেনাৰ নেতা অভিশেষ বৰাৰ বিৰুদ্ধে উস্থাপিত ৰাজহুৱা প্ৰস্তাৱৰ পিছত সেনাৰ কেন্দ্ৰীয় সমিতিয়ে নেতা গৰাকীৰ বিৰুদ্ধে কি ব্যৱস্থা গ্ৰহণ কৰে সেইয়া হ’ব লক্ষ্যনীয়।