নিউজ ডেস্ক,২৪ডিচেম্বৰ : যশস্বী চলচ্চিত্ৰ নিৰ্মাতা শ্যাম বেনেগালৰ দেহাৱসান(Filmmaker Shyam Benegal passes away)।
সোমবাৰে সন্ধিয়া ৬:৩০ বজাত মুম্বাইত শেষ নিশ্বাস ত্যাগ কৰে প্ৰসিদ্ধ চলচ্চিত্ৰ নিৰ্মাতাগৰাকীয়ে। মৃত্যুৰ সময়ত তেওঁৰ বয়স আছিল ৯০ বছৰ।মুম্বাই চেন্ট্ৰেলৰ এখন হাস্পতালত মৃত্যু হয় শ্যাম বেনেগালৰ। দীৰ্ঘদিনে বৃক্ক ৰোগত আক্ৰান্ত হৈ আছিল তেওঁ।বেনেগালৰ কন্যা পিয়া বেনেগালে জানিবলৈ দিয়ে শ্যাম বেনেগালৰ বিয়োগৰ এই খবৰ। দীৰ্ঘদিনে অসুস্থ হৈ আছিল চলচ্চিত্ৰ নিৰ্মাতাগৰাকী(Filmmaker Shyam Benegal passes away at the age of 90)।
শ্যাম বেনেগালৰ কেৰিয়াৰে পাঁচ দশকৰো অধিক সময় ধৰি ভাৰতীয় চিনেমাৰ এজন অগ্ৰণী চলচ্চিত্ৰ নিৰ্মাতা হিচাপে তেওঁৰ স্থান দৃঢ় কৰি তুলিছিল।
১৯৭৪ চনত নিৰ্মিত ছবি ‘অংকুৰ’ৰ জৰিয়তে তেওঁ চলচ্চিত্ৰ জগতত আত্মপ্ৰকাশ কৰে।তাৰ পাছৰ ছবি যেনে “নিশান্ত” (১৯৭৫), “মন্থন” (১৯৭৬), আৰু “ভূমিকা” (১৯৭৭) আদিয়ে তেওঁক নিপুণ পৰিচালক হিচাপে সুনাম সুদৃঢ় কৰি তুলিছিল, যাৰ ফলত তেওঁ অসংখ্য ৰাষ্ট্ৰীয় আৰু আন্তঃৰাষ্ট্ৰীয় প্ৰশংসা লাভ কৰিছিল।পিছলৈ বেনেগালে “মাণ্ডী” (১৯৮৩), “ত্ৰিকাল” (১৯৮৫), আৰু “চৰ্দাৰী বেগম” (১৯৯৬) আদি কেইবাখনো সমালোচকৰ প্ৰশংসিত ছবিও নিৰ্মাণ কৰে।
১৯৭৬ চনত পদ্মশ্ৰী বঁটা লাভ কৰিছিল শ্যাম বেনেগালে। ১৯৯১ চনত ভাৰত চৰকাৰে দিছিল পদ্মভূষণ সন্মান। ২৮টা ৰাষ্ট্ৰীয় চলচ্চিত্ৰ বঁটা লাভ কৰিছিল শ্যাম বেনেগালে। ভাৰতৰ সৰ্বোচ্চ সন্মান দাদা চাহেব ফাল্কে বঁটাও লাভ কৰিছিল তেওঁ।
লগতে পঢ়ক :Man goes Missing :সোণাৰি চাহ বাগিচাৰ পৰা পুনৰ নিৰুদ্দেশ দুজনকৈ লোক