Ashok Singhal reviewed Irrigation Department : গুৱাহাটী পৌৰ নিগম আৰু জলসিঞ্চনৰ কাম-কাজ পৰ্যালোচনা মন্ত্ৰী অশোক সিংঘালৰ
নিউজ ডেস্ক, ১৪ জুন : গৃহ নিৰ্মাণ আৰু নগৰ পৰিক্ৰমা তথা জলসিঞ্চন বিভাগৰ মন্ত্ৰী অশোক সিংঘালে আজি অৰ্থাৎ বুধবাৰে তেওঁৰ জনতা ভৱনস্থিত নিজ কাৰ্যালয়ৰ সভাকক্ষত আয়োজিত এক বৈঠকত গুৱাহাটী পৌৰ নিগমৰ কাম-কাজৰ ওপৰত পৰ্যালোচনা কৰে (Guwahati Municipal Corporation And Irrigation Department)।
নিগমৰ গোটা আৱৰ্জনা নিষ্কাশন ব্যৱস্থাপনাৰ শেহতীয়া স্থিতিৰ বুজ লোৱাৰ লগতে আৱৰ্জনা সংগ্ৰহৰ কামত নিয়োজিত বেচৰকাৰী সংস্থা আৰু আত্মসহায়ক গোট তথা ৱাৰ্ড উন্নয়ন সমিতিসমূহৰ বাবে পৌৰ নিগমে প্ৰস্তুত কৰা খচৰা এছ অ’ পি সন্দৰ্ভতো আজিৰ বৈঠকত আলোচনা কৰা হয়। পৰৱৰ্তী ৬ মাহৰ ভিতৰত গুৱাহাটী মহানগৰীৰ সমগ্ৰ ৬০ টা ৱাৰ্ডৰ সকলো পথ যাতে মুকলিভাৱে পৰি থকা জাবৰ-জোঁথৰৰ পৰা মুক্ত হয় তাৰ বাবে উপযুক্ত পদক্ষেপ গ্ৰহণ কৰিবলৈ মন্ত্ৰীগৰাকীয়ে পৌৰ নিগমৰ আয়ুক্তক নিৰ্দেশ দিয়ে (Minister Ashok Singhal) ।
মহানগৰীৰ বিভিন্ন অঞ্চলত নলা-নৰ্দমাৰ পৰা বোকা নিষ্কাশনৰ কামত নিয়োজিত ছুপাৰ ছাকাৰ মেচিনসমূহৰ পৰিচালনাৰ সৈতে জড়িত বিষয়া আৰু ঠিকাদাৰসকলৰ সৈতেও আজিৰ বৈঠকত মন্ত্ৰীগৰাকীয়ে আলোচনাত মিলিত হয়।
সংশ্লিষ্ট এলেকাৰ অভিযন্তাসকলক তত্কালিন ভাবে এতিয়াও পৰিষ্কাৰ নোহোৱা নলাৰ তালিকা জমা দিবলৈ নিৰ্দেশ দিয়াৰ লগতে প্ৰতিদিনে কমেও ১০ খন ছুপাৰ ছাকাৰ বাহনক কামত নিয়োজিত কৰাটো সুনিশ্চিত কৰিবলৈও নিৰ্দেশ দিয়ে মন্ত্ৰীগৰাকীয়ে ।
বৈঠকত উপস্থিত থাকে গুৱাহাটীৰ মেয়ৰ মৃগেন শৰণীয়া, গৃহ নিৰ্মাণ আৰু নগৰ পৰিক্ৰমা বিভাগৰ আয়ুক্ত-সচিব কবিতা পদ্মনাভন আৰু পৌৰ নিগমৰ আয়ুক্ত মেঘনিধি দাহাল ।
সংশ্লিষ্ট জিলাসমূহত চলি থকা জলসিঞ্চন বিভাগৰ আঁচনিসমূহৰ পৰ্যালোচনা কৰা, বিকল হৈ থকা আঁচনিসমূহ পুনৰুজ্জীৱিত কৰা তথা নতুন আঁচনিৰ পৰিকল্পনা যুগুত কৰিবৰ বাবে প্ৰতিজন অতিৰিক্ত মুখ্য অভিযন্তাক বছৰি ন্যূনতম চাৰিখন জিলা ভ্ৰমণ কৰিবলৈ তেওঁ নিৰ্দেশ দিয়ে।
লগতে জলসিঞ্চন বিভাগৰ বিষয়াসকলৰ সৈতে অনুষ্ঠিত বুধবাৰৰ দিনটোৰ আন এখন বৈঠকতো মন্ত্ৰী সিংঘালে জলসিঞ্চন বিভাগৰ শেহতীয়া কাম-কাজসমূহৰ পৰ্যালোচনা কৰে। বিভাগটোৰ বিভিন্ন শাখাৰ অতিৰিক্ত মুখ্য অভিযন্তাসকলক নিয়মীয়াকৈ ক্ষেত্ৰ ভ্ৰমণ কৰিবলৈ নিৰ্দেশ দিয়ে ।
আজিৰ এই বৈঠকত মন্ত্ৰীগৰাকীয়ে প্ৰতিখন জিলাৰ বাবে এক বিস্তৃত জলসিঞ্চন পৰিকল্পনা প্ৰস্তুত কৰাৰ ওপৰত গুৰুত্ব আৰোপ কৰাৰ লগতে বিভাগীয় বিষয়াসকলক জলসম্পদ বিভাগৰ সৈতে ঘনিষ্ঠ সমন্বয়ৰে কাম কৰি বছৰৰ সকলো ঋতুতে ৰাজ্যৰ নদীসমূহৰ পানীৰ উপলব্ধতাৰ সঠিক তথ্য সংগ্ৰহ কৰিবলৈ নিৰ্দেশ দিয়ে ।
বৈঠকত জলসিঞ্চন বিভাগৰ আয়ুক্ত-সচিব এম এছ মনিৱন্নন আৰু সচিব পৱিত্ৰৰাম খাউণ্ডৰ লগতে মুখ্য অভিযন্তাকে ধৰি বিভাগটোৰ আটাইকেইগৰাকী অতিৰিক্ত মুখ্য অভিযন্তা উপস্থিত থাকে ।
লগতে পঢ়ক : Ambubachi Mela 2023 : অম্বুবাচী মেলাৰ বাবে শিক্ষকক দিয়া হৈছে দায়িত্ব