নিউজ ডেস্ক, ১ আগষ্ট : ৰাজ্যত অব্যাহত আছে ড্ৰাগছৰ বিৰুদ্ধে আৰক্ষীৰ অভিযান । আজি অসম আৰক্ষীয়ে গুৱাহাটী আৰু ইয়াৰ আশে-পাশে দুটা পৃথক স্থানত চলোৱা অভিযানৰ সময়ত বৃহৎ পৰিমাণৰ অবৈধ গাঞ্জা জব্দ কৰে।
দেওবাৰে নিশা মহানগৰৰ পল্টনবজাৰ অঞ্চলত অৱস্থিত এখন হোটেলৰ পৰা বৃহৎ পৰিমাণৰ গাঞ্জা জব্দ কৰা হয়।
গাঞ্জাখিনি জব্দ কৰাৰ সন্দৰ্ভত এগৰাকী মহিলাসহ পাঁচজন লোকক গ্ৰেপ্তাৰ কৰা হয়।
আৰক্ষীয়ে জনোৱা অনুসৰি, গোপন তথ্যৰ ভিত্তিত চুমিয়া হোটেলত আৰক্ষীয়ে এক অভিযান চলাই দুটা পৃথক কোঠাৰ পৰা ৩৬ কিলোগ্ৰাম ওজনৰ গাঞ্জা জব্দ কৰা হৈছিল।
গ্ৰেপ্তাৰ কৰা লোককেইজনক ত্ৰিপুৰাৰ সোণামুৰা জিলাৰ বাসিন্দা মুনিৰ হুছেইন, চাইফুল বাছা, চাহিদা খাতুন, আনোৱাৰ হুছেইন আৰু ৰাকেশ দেৱনাথ বুলি চিনাক্ত কৰা হৈছে।
জব্দ কৰাৰ পিছত, অভিযুক্ত ব্যক্তিসকলৰ বিৰুদ্ধে NDPS আইনৰ অধীনত এটা গোচৰ ৰুজু কৰা হৈছে।
পৰৱৰ্তী তথ্যৰ বাবে আৰক্ষীয়ে অভিযান অব্যাহত ৰাখিছে।
আন এটা ঘটনাত, যোৰাবাটত ৪০ কিলোগ্ৰাম গাঞ্জাৰ সৈতে দুজন লোকক আটক কৰা হৈছিল ।
আনহাতে, গ্ৰেপ্তাৰকাৰীসকলৰ পৰিচয় এতিয়াও জানিব পৰা হোৱা নাই।
খবৰ অনুসৰি, আটক কৰা লোক দুজনে গাঞ্জাসমূহ গুৱাহাটীলৈ পৰিবহন কৰি আছিল।