নগাঁৱৰ পৰা বিশ্বজিৎ দাসঃ নগাঁও চহৰৰ হয়বৰগাঁও এ.টি ৰোডৰ বিশিষ্ট সমাজকৰ্মী, বৰ্ষীয়ান নাগৰিক প্ৰভাত চন্দ্ৰ দাসে (৮৩) আজি দুপৰীয়া নিজ বাসভৱনত শেষ নিশ্বাস ত্যাগ কৰে৷ তেখেতৰ মহাপ্ৰয়াণৰ খবৰ বিয়পি পৰাত বহু সংখ্যক গুণমুগ্ধ আৰু শুভাকাংক্ষী বাসগৃহত উপস্থিত হৈ শেষ শ্ৰদ্ধাঞ্জলি জ্ঞাপন কৰে৷ হয়বৰগাঁও নাট্য সমিতি, নগাঁও জিলা জ্যেষ্ঠ নাগৰিক সন্মিলনী, হয়বৰগাঁও শ্মশান সমিতি, সদৌ অসম গ্ৰাম্য পুথিভঁৰাল সন্থাৰ লগতে বহু অনুষ্ঠান-প্ৰতিষ্ঠানৰ সৈতে জড়িত আছিল প্ৰভাত চন্দ্ৰ দাস৷ বৃহত্তৰ হয়বৰগাঁও ব্যৱসায়ী সন্থা, সদৌ নগাঁও ভোগালী বিহু সমিতি, সত্য সাই সমিতি, উত্তৰ হয়বৰগাঁও নামঘৰ সমিতি সহ বহু অনুষ্ঠান-প্ৰতিষ্ঠানৰ স’তে ওত:প্ৰোতভাবে জড়িত থকা বৰ্ষীয়ান নাগৰিকগৰাকীৰ নশ্বৰদেহ বিয়লি হয়বৰগাঁও চান্দমাৰীস্থ শ্মশানত শেষকৃত্য সম্পন্ন কৰা হয়৷ মৃত্যুৰ সময়তে দাসে পত্নী, একমাত্ৰ পুত্ৰ, বোৱাৰী আৰু এগৰাকী নাতিনী ইহসংসাৰত এৰি যায়৷ প্ৰয়াত দাসৰ মৃত্যুত নগাঁৱৰ বহু কেইটা অনুষ্ঠান-প্ৰতিষ্ঠানৰ গভীৰ শোক প্ৰকাশ কৰাৰ লগতে শোকসন্তপ্ত পৰিয়াললৈ গভীৰ সমবেদনা জনায়৷
