ৰঙিয়াৰ স্বেচ্ছাসেৱী সংগঠন শংকৰ আজান স্বচ্ছতা হি সেৱাৰ উদ্যোগত পৌৰসভা এলেকাৰ ৫নং ৱাৰ্ডৰ পঞ্চায়ত ভৱনৰ কাষৰ জমিৰ আলী পথটিৰ জৰাজীৰ্ণ, দুৰ্গন্ধময় হোৱাৰ উপৰি জহি খহি যোৱা নলা-নৰ্দমাটো আজি স্থানীয় ৰাইজৰ সহযোগত মেৰামতিৰ কাম কৰে। এইক্ষেত্ৰত অঞ্চলটোৰ ৰাইজে পৌৰসভাৰ ৫নং ৱাৰ্ডৰ কমিছনাৰ তথা পৌৰনেত্ৰীৰ ওচৰত কেইবাবাৰো আবেদন দাখিল কৰিছিল যদিও বিভাগীয়ভাৱে কামখিনি হৈ নুঠিল। এজাক বৰষুণ দিলে পথটিৰ ওপৰেৰে নলা-নৰ্দমাটোৰ পৰা বাগৰি অহা দূষিত পানীয়ে অঞ্চলটি কদৰ্যময় কৰি যাতায়তৰ অনুপযোগী কৰি তোলে । এইক্ষেত্ৰত ৰঙিয়া পৌৰসভাৰ নিৰ্লিপ্ত কাম-কাজৰ বাবে স্থানীয় ৰাইজে ক্ষুদ্ধ হৈ কৰ্মস্পৃহা স্বেচ্ছাসেৱী সংগঠনটোৰ দক্ষ সভাপতি জাকিৰ হুছেইন আৰু সম্পাদক মোছাব্বীৰ আলীৰ নেতৃত্বত পথটিৰ লগতে নৰ্দমাটোৰ পুনৰ নিৰ্মাণৰ কাম আৰম্ভ কৰে।
উল্লেখ্য যে মহকুমাটোৰ আগশাৰীৰ দুখনকৈ ব্যক্তিগত খণ্ডৰ শিক্ষানুষ্ঠান প্ৰেগমেটিক একাডেমী জুনিয়ৰ কলেজ আৰু বিদ্যামন্দিৰ একাডেমী জুনিয়ৰ কলেজৰ ছাত্ৰ-ছাত্ৰী, শিক্ষক-শিক্ষয়িত্ৰীৰ উপৰি অৰ্ধ-সহস্ৰাধিক ৰাইজৰ ৰঙিয়া টাউনলৈ অহা-যোৱা কৰাৰ এইটো একমাত্ৰ মূল পথ। এনেক্ষেত্ৰত অঞ্চলটোৰ ৰাইজৰ লগতে স্বেচ্ছাসেৱী সংগঠনটোৱে বিভাগীয় কৰ্তৃপক্ষৰ দৃষ্টি নিক্ষেপ কৰি যাতায়তৰ উপযুক্ত ব্যৱস্থা কৰাৰ বাবে প্ৰশাসনক কাতৰ আহ্বান জনাইছে।