সততে হিন্দু- মুছলমানৰ মাজত বিদ্বেষ তথা সাম্প্ৰদায়িক সংঘাটত সৃষ্টি হোৱাৰ বিপৰীতে সৰ্থেবাৰীৰ বেলবাৰীত দেখা গ’ল এক উল্লেখযোগ্য সমন্বয় । হিন্দু লোকৰ দান বৰঙণিত নিৰ্মাণ কাৰ্য আৰম্ভ হৈছে মছজিদৰ।
সৰ্থেবাৰীৰ বেলবাৰী জামে মছজিদ । হিন্দু বসতি প্ৰধান বেলবাৰীত আছে প্ৰায় ঌ৪ ঘৰ মুছলমান সম্প্ৰদায়ৰ লোক। ইছলাম ধৰ্মালম্বী লোক সকলৰ উপাসনাৰ থলি মছজিদটো নতুনকৈ নিৰ্মাণ কৰাৰ বাবে সমগ্ৰ অঞ্চলটোৰ হিন্দু ধৰ্মালম্বী লোকে আগবঢ়াইছে দান- বৰঙণি । বহু হিন্দু লোকে বাঁহ, চিমেন্ট, নগদ ধন দান কৰিছে । আৰু এইদৰেই হিন্দু ধৰ্মালম্বী লোকৰ দান বৰঙণিৰে আনুষ্ঠানিক ভাবে আৰম্ভ কৰিলে মছজিদৰ নিৰ্মাণ কাৰ্য।
মছজিদৰ শুভ নিৰ্মাণ কাৰ্য উপলক্ষ্যত এইদৰে অনুষ্ঠিত হ’ল এখন সম্বৰ্ধনা সভা । আৰু সভাত সকলো সম্প্ৰদায়ৰ লোক হ’ল মিলিত । আৰু এইদৰেই এক সমন্বয়ৰ বাৰ্তা লৈ সৰ্থেবাৰীৰ বেলবাৰীত আৰম্ভ হ’ল মছজিদ নিৰ্মাণৰ কাম । পঞ্চগ্ৰাম উন্নয়ন সমিতিয়ে দুই লাখ টকা বৰঙণি আগবঢ়াইছে মছজিদ নিৰ্মাণ কাৰ্যত। পঞ্চগ্ৰামৰ অধীনস্থ গাঁওকেইখন হৈছে বেলবাৰী, বেলৰবৰী, বেলবাৰী মুছলিম চুপা, বাঘমাৰা, বাঘমাৰা পাম।
পঞ্চগ্ৰামত পূৰ্বৰে পৰা হিন্দু-মুছলমানৰ মাজত ঐক্য- সম্প্ৰীতি- সমন্বয় আছে বুলি জানিবলৈ দিয়ে পঞ্চগ্ৰামৰ সভাপতি মনিকান্ত ডেকা আৰু নন্দেশ্বৰ ডেকাই । ইয়াৰ উপৰিও বৰকাপলা, বন্নাৰপাৰ গাঁওৰ হিন্দু লোকেও দান বৰঙনি আগবঢ়াইছে বুলি জানিবলৈ দিয়ে বেলবাৰী মুছলিম চুপাৰ সমাজকৰ্মী পুতুল আলীয়।