Local, Vocal, Global

ব্রাজিলৰ সর্বোচ্চ খিতাব ত্যাগ ২১ বিজ্ঞানীৰ

0 12

ৰাষ্ট্ৰপতি জাইৰ ব’লছ’নাৰ’ৰ সিদ্ধান্তৰ প্রতিবাদত বিজ্ঞানৰ ক্ষেত্রত ব্রাজিলৰ সর্বোচ্চ খিতাব ত্যাগ কৰাৰ সিদ্ধান্ত ল’লে দেশখনৰ ২১ জন বিজ্ঞানীয়ে । এখন মুকলি পত্ৰত প্রশাসনক এই সিদ্ধান্তৰ কথা জনাইছে তেওঁলোকে । ব্রাজিলৰ ৰাষ্ট্ৰপতি জাইৰ ব’লছ’নাৰ’ৰ কথাত সন্মতি নজনালেই কোপত পৰে তেওঁলোক, এই দাবী বিজ্ঞানীসকলৰ ।

উল্লেখ্য, ১৯৯২ৰ পৰাই বিজ্ঞান আৰু প্রযুক্তিত গুৰুত্বপূর্ণ অবদানৰ বাবে ‘নেচনেল অর্ডাৰ অৱ ছায়েন্টিফিক মেৰিট’ নামক খিতাব দিয়া হয় ব্রাজিলৰ গৱেষক আৰু বিজ্ঞানীসকলক ।

যোৱা বুধবাৰে ব্ৰাজিলৰ ২৫ জন কৃতী বিজ্ঞানী আৰু ৰাষ্ট্ৰীয় ব্যক্তিত্বক এই সন্মানৰ বাবে মনোনীত কৰে ব’লছ’নাৰ’ৰ প্রশাসনে । কিন্তু ঠিক তাৰ দুদিন পাছতেই, অর্থাৎ শনিবাৰে সেই তালিকাৰ পৰা দুই বিজ্ঞানীৰ নাম প্ৰত্যাহাৰ কৰে ৰাষ্ট্ৰপতিয়ে । এই দুজন যথাক্রমে ডক্টৰ মার্কাছ লেছার্ডা আৰু ডক্টৰ এডেল বেনজাকেন । কৰ’না অতিমাৰীৰ প্রাক কালত ভাইৰাছৰ বিৰুদ্ধে যুঁজ দিবলৈ হাইড্রক্সিক্লোৰ’কুইন ঔষধৰ ব্যৱহাৰৰ বিষয় উত্থাপন হোৱাৰ সময়ত, ব’লছ’নাৰ’ সেই ঔষধৰ অন্যতম সমর্থক আছিল । সেই সময়ত বিজ্ঞানী লেছার্ডাই এটা গৱেষণাপত্র প্রকাশ কৰি জনায় যে ক’ভিডৰ বিৰুদ্ধে যুঁজ দিবলৈ ক্লোৰ’কুইন ৰাষ্ট্ৰীয় ঔষধ কার্যকৰী নহয় । তাৰ পাছতেই তেওঁৰ ওপৰত সৰৱ হয় ব’লছ’নাৰ’ প্রশাসন ।

আনহাতে, ২০১৯ত ব্রাজিলৰ স্বাস্থ্য মন্ত্রণালয়ৰ এইছআইভি/এইডছ দপ্তৰৰ ডিৰেক্টৰৰ পদৰ পৰা পদচ্যুত কৰা হয় বিজ্ঞানী বেনজাকেনক । তেওঁৰ অপৰাধ আছিল, ৰূপান্তৰকামীসকলৰ স্বাস্থ্য সন্দৰ্ভত তেওঁৰ দপ্তৰে এটা পেমফ্লেট প্রকাশ কৰিছিল । তাৰ পাছৰ পৰাই বাওঁপন্থী ৰাষ্ট্ৰপতিৰ অপছন্দৰ তালিকাত অন্তৰ্ভুক্ত হয় তেওঁলোক । সেই অপছন্দৰেই ‘ফল’ হিচাপে শনিবাৰে সন্মানৰ তালিকাৰ পৰা বাদ পৰে তেওঁলোক ।

খবৰটো পোৱা মাত্রকে ২১ জন বিজ্ঞানীয়ে সন্মান ত্যাগ কৰাৰ সিদ্ধান্ত লয় । পত্ৰত তেওঁলোকে জনাইছে, বিজ্ঞান, প্রযুক্তি আৰু নতুন আৱিষ্কাৰৰ ওপৰত পুনৰ নির্লজ্জ আক্রমণ কৰিলে ব্রাজিলৰ ৰাষ্ট্ৰপতিয়ে । দীর্ঘদিন ধৰি বিজ্ঞানীসকলৰ সমালোচনা আৰু প্রতিবাদৰ কেন্দ্রে তেওঁ ।

Leave A Reply

Your email address will not be published.