শোণিতপুৰ জিলাৰ বৰছলাত বিলত গা ধূবলৈ গৈ ৰূপন মালাকাৰ নামৰ স্থানীয় এগৰাকী যুৱকে কৰুণ মৃত্যুক সাৱটিলে৷ শুকুৰবাৰে বিয়লি এই শোকাৱহ দুৰ্ঘটনাটো সংঘটিত হয়৷ জানিব পৰা মতে কালি দিনৰ প্ৰায় ২ মান বজাত দুই বন্ধু অনিল মালাকাৰ আৰু ৰূপন মালাকাৰে গা ধূবলৈ বুলি বৰছলা বিলৰ মাজলৈ নাৱেৰে যাত্ৰা কৰে৷ কিছুসময়ৰ পাছত দুই বন্ধুৱে বিলৰ মাজত নাঁৱৰ পৰা নামি আনন্দৰে গা ধুবলৈ আৰম্ভ কৰে যদিও হঠাতে অহা এজাক বতাহে তেওঁলোকৰ কাষতে থকা নাওখন বহুদূৰত লৈ গুচি যায়৷ নাওখন দূৰলৈ আঁতৰি যোৱাত দ’ বিলখনত গা ধোৱাত নিমগ্ন হৈ থকা যুৱকদ্বয়ৰ মাজত হাহাকাৰ লাগে আৰু লাহে লাহে দুয়ো পানীৰ তলত ডুব যাব ধৰে৷ দূৰৈৰ পৰা এগৰাকী নাৱৰীয়াই এই দৃশ্য দেখি ততাতৈয়াকৈ আহি অনিলক কোনোমতে জীৱিত অৱস্থাত উদ্ধাৰ কৰে যদিও ৰূপনক উদ্ধাৰ কৰিবলৈ অপৰাগ হয়৷ খবৰটো শুনি বিলৰ পাৰত উপস্থিত হোৱা স্থানীয় ৰাইজে ৰূপনক বিচাৰি নাৱেৰে উদ্ধাৰ অভিযান চলায় আৰু কিছু সময়ৰ পিছত ৰূপনক উদ্ধাৰ কৰিবলৈ সক্ষম হয় যদিও চিকিৎসকে ৰূপনক মৃত বুলি ঘোষণা কৰে৷ এই আকস্মিক দুঃসংবাদটোৰ বাবে ৰূপনৰ দুৰ্ভগীয়া পৰিয়ালটি শোকত ভাঙি পৰে আৰু অঞ্চলজুৰি শোকৰ ছাঁ পৰে৷
