নিউজ ডেস্কঃ ২০২২ চনৰ ৩ জানুৱাৰীৰ পৰা তেলৰ চহৰ দুলিয়াজানত ৰাজ্যখনৰ আৰক্ষী অধীক্ষসকলৰ দুদিনীয়া সন্মিলন অনুষ্ঠিত হ’ব। শক্তি আৰু ক্ৰীড়া মন্ত্রী বিমল বৰাই মঙলবাৰে উপায়ুক্তৰ সন্মিলন কক্ষত আয়োজিত এখন সংবাদমেলত সংবাদ মাধ্যমৰ লোকসকলৰ আগত এই কথা সদৰী কৰে। তেঁও লগতে প্ৰকাশ কৰে যে ডি আই জি, আই জি পি আৰু উপ বিভাগীয় আৰক্ষী বিষয়াকে ধৰি অন্যান্য জ্যেষ্ঠ আৰক্ষী বিষয়াসকলে সন্মিলনখনত অংশগ্রহণ কৰিব।
তেঁও লগতে কয় যে মুখ্যমন্ত্রী ড০ হিমন্ত বিশ্ব শৰ্মাইও সন্মিলনত অংশগ্রহণ কৰিব। শক্তি আৰু ক্ৰীড়া মন্ত্রী বৰাই লগতে কয় যে মুখ্যমন্ত্রীয়ে অসামৰিক আৰু আৰক্ষী প্ৰশাসনৰ হ্ৰাস হোৱা প্ৰতিচ্ছৱি পুনৰুজ্জীৱিত কৰাৰ বাবে কেইবাটাও পদক্ষেপ গ্রহণ কৰিছে আৰু ৰাজ্যৰ বিভিন্ন স্থানত উপায়ুক্ত আৰু আৰক্ষী অধীক্ষক সন্মিলন আৰম্ভ কৰিছে যাতে সাধাৰণ মানুহে বলবৎ কৰা আইনৰ পৰা সকলো ধৰণৰ সহায় লাভ কৰিব পাৰে।
ইফালে, কেইমাহমান আগতে কাজিৰঙাত এছ পি সন্মিলন অনুষ্ঠিত হৈছিল আৰু কাৰ্বি আংলং জিলাৰ ডিফুত ডি চি ৰ একেধৰণৰ সন্মিলন অনুষ্ঠিত হৈছিল। বিমল বৰাই কয় যে এছ পি সকলৰ এনে সন্মিলনে ৰাজ্যখনৰ ৩ কোটি ৩০ লাখ লোকৰ জীৱন আৰু সম্পত্তি সুৰক্ষিত কৰাৰ বাবে কাম কৰিবলৈ ৰাজ্যখনৰ ৭০ হাজাৰৰো অধিক আৰক্ষী কৰ্মীক উৎসাহিত আৰু অনুপ্ৰাণিত কৰিব।
তাৰোপৰি, মন্ত্রীগৰাকীয়ে কয়, মুখ্যমন্ত্রী ড০ হিমন্ত বিশ্ব শৰ্মাই ৰাজ্যখনৰ যুৱক-যুৱতীসকলক ড্ৰাগছৰ পৰা মুক্ত কৰাৰ বাবে ড্ৰাগছমুক্ত অসম গঢ়াৰ সিদ্ধান্ত গ্ৰহণ কৰাৰ পিছৰে পৰা ৰাজ্যখনত ড্ৰাগছৰ বিৰুদ্ধে অভিযান আৰম্ভ কৰিছে। সমগ্র ৰাজ্যতে এই অভিযান চলি আছে আৰু আইন প্ৰৱৰ্তনকাৰী কৰ্তৃপক্ষই জব্দ কৰা যিকোনো পৰিমাণৰ ড্ৰাগছ পিছত জ্বলাই দিয়া হৈছে